Obradoiro de educación sexual dende a familia

Dende a Federación Provincial de ANPAs nos trasladan a próxima realización do obradoiro " Educación sexual en familia", impartido pola Doutora Carol Strate e enfocado exclusivamente a adultos.

Terá lugar o o día 14 de decembro (sábado) en horario de 10:30 á 12:30 na sede da Federación, na rúa Orzán nº 21 da Coruña.

A poñente, que xa ten visitado o noso colexio para traballar co alumnado e as familias, explicará e resolverá dúbidas sobre como afrontar estes temas dende a infancia.

Para asistir é preciso inscribirse no seguinte formulario: https://forms.gle/MmD9hDYhc2wqDQJg8. O prazo para facelo finaliza o xoves día 12.

Agardamos que sexa do voso interese.

Xunta Directiva ANPA Valle Inclán

Equipo de Xadrez do CEIP Valle Inclán

O pasado sábado 30 de novembro, un equipo de nenos e nenas da actividade extraescolar de XADREZ da ANPA Valle Inclán participou no II Campionato de Xadrez por Colexios organizado pola Diputación da Coruña, da man do seu profesor Marco Morales, do Club de Ajedrez Coruña.

Foi unha actividade moi intensa, divertida e de moito proveito para a cativada e as súas familias.

Parabéns a todo o equipo, que xogou unido e apoiándose mutuamente no torneo, representando ó noso cole, o CEIP Valle Inclán!!

Formación para Xuntas Directivas das ANPAs

O pasado Sábado 23 de Novembro tivo lugar, na sede da Federación Provincial de ANPAs a Coruña, na Rúa do Orzán, a Formación para Xuntas Directivas das ANPAs sobre Obrigas Contables e Fiscais.

Unha representación da Xunta Directiva da ANPA Valle Inclán asistiu ó curso, de gran interese.

Moitas grazas á Federación por brindar estas oportunidades de seguir mellorando no noso traballo na asociación, que redunda en melloras para a nosa cativada.

Xunta Directiva ANPA Valle Inclán

25-N De Fronte contra a violencia

Este ano, adherímonos á campaña DE FRONTE contra a violencia contra as mulleres. 

Aproveitamos para compartir recursos e propostas para traballar en familia.

http://www.defronte.gal/recursos-e-propostas/

Xunta Directiva ANPA Valle Inclán

CAMPANADAL 2024 CONCELLO DE OLEIROS

O Concello organiza o Campanadal para nenos e nenas de entre 3 e 11 anos os días 23, 24, 26 e 27 de decembro, unha actividade que se desenvolverá en horario de 9:00 a 14:00 horas no Albergue municipal da Finca Tenreiro, en Nós.

O prazo de preinscrición abre o luns 25 de novembro a través da web municipal.

PEQUECHEF E PONTE AL DÍA, XORNADAS DE PORTAS ABERTAS

Estimadas familias,

este mes haberá xornada de portas abertas nas actividades de:

PEQUECHEF (venres de 16:00 a 17:30 horas, para alumnado de infantil)

PONTE AL DÍA (luns e mércores de 16:00 a 17:00 horas, para alumnado de primaria)

Os vosos peques poderán asistir de forma gratuíta a unha clase, podedes elixir o día e inscribilos no teléfono 697 433 122.

Animádevos a probar!

Concesión da subvención do Concello Oleiros 2024

Conforme á notificación do Decreto da Alcaldía nº 767750, de 17 de outubro, mediante o que se resolveu a concesión de subvencións a entidades do ano 2024 para a promoción e difusión da cultura e o deporte, a ANPA Valle Inclán recibirá un total de 15.543,83 euros para sufragar parcialmente os gastos do exercicio correspondentes á realización das seguintes actividades:

· Campamento de Ciencia

· Formación para familias e docentes

· Obradoiros formativos para o alumnado

· Festas escolares

· Agasallos de graduación para 6º de Educación Primaria

· Subscrición á revista Pantera para a Biblioteca escolar

· Actividades extraescolares para o alumnado:

Teatro musical

Robótica

Música e movemento

Hockei iniciación

Hockei II

Baile galego e pandeireta

Balonmán

Xadrez

Baloncesto

Patinaxe

Xogos e psicomotricidade

Acrodance

Arte e pintura

UN PREMIO DE TOD@S!! GRAZAS E PARABÉNS!!

Estimadas familias,

Dende a Concellería de Cultura do Concello de Oleiros trasládannos unha gran nova!

No día de hoxe, publicouse no DOGA a concesión do Premio á Innovación Bibliotecaria de Galicia ao Concello de Oleiros polo proxecto “Ler para Saber: a Ciencia”, presentado ao concurso pola Biblioteca Central Rialeda.

A Consellería de Cultura da Xunta de Galicia concede este premio, na categoría de concellos de máis de 10.000 habitantes, ao Concello de Oleiros por este proxecto, organizado pola Biblioteca Central Rialeda e polo Colexio Valle Inclán de Perillo, baixo a coordinación de Mariluz Corral Uzal e a profesora Fina Mosquera.

Para levar a cabo este proxecto é imprescindible a colaboración do profesorado, do alumnado e dos pais e nais de alumnos do CEIP Valle Inclán , así como dos diversos expertos nas diferentes materias que se tratan ao longo de todo o programa, os cales participan de xeito altruísta e gratuíto.

Énchenos de felicidade este recoñecemento ó gran traballo que se está a levar a cabo dende hai anos e queremos sumarnos ó agradecemento e felicitación que trasladan dende o Concello, en primeiro lugar, a Fina Mosquera: é un privilexio e unha ledicia poder contar cunha persoa coma ela no noso cole. E por suposto, a todos os mestres, alumnado, familias e poñentes participantes no proxecto ao longo destes anos. 

Grazas e parabéns!

PRAEMO · Programa de reforzo e apoio escolar Concello de Oleiros

LER PARA SABER

Hoxe terá lugar a primeira sesión deste programa divulgativo e de promoción da cultura na que colaboran as Bibliotecas de Oleiros, a Universidade da Coruña e o Concello de Oleiros.

Día:Venres, 11 de outubro
Lugar: Biblioteca Central Rialeda (Perillo)
Hora: 18:30 h.
Os fungos. Curiosidades
Raquel Poncini Gómez. Vicepresidenta da Asociación Micolóxica Coruñesa

O programa “Ler para saber” inclúe charlas científicas e obradoiros dirixidos a nenas e nenos a partir de 10 anos, adolescentes e público en xeral.

Son charlas divulgativas que permiten concretar conceptos e ideas básicas e solucionar dúbidas a todas aquelas persoas que desexen compartir a curiosidade e o interese polos temas da ciencia.

Tedes toda a información premendo na seguinte ligazón:

https://www.oleiros.org/concelleria-de-cultura-e-normalizacion-linguistica/bibliotecas/actividades/actividades-de-promocion-da-lectura-e-culturais/ler-para-saber/-/asset_publisher/kkZ2ajwDOyFk/content/ler-para-saber-a-ciencia-11-de-outubro-2024?_com_lifer

Xunta Directiva ANPA Valle Inclán

BALONCESTO, ÚLTIMAS PRAZAS DISPOÑIBLES

Aínda quedan prazas dispoñibles na actividade extraescolar de BALONCESTO, os luns e mércores de 16:00 a 17:00 horas.

Animádevos! Podedes apuntarvos premendo na seguinte ligazón:

https://anpavalleinclan.miampa.com/extracurricular/668e4791f53060003d391c3b

PONTE AO DÍA, PRAZAS DISPOÑIBLES, LUNS E MÉRCORES

BONO CONCILIA XUNTA DE GALICIA 2024

YOGA (Ed. Infantil, 1º e 2º Ed. primaria) PRAZAS DISPOÑIBLES

TEATRO MUSICAL, PRAZAS LIBRES

Aínda quedan prazas dispoñibles na actividade extraescolar de TEATRO MUSICAL, os venres de 16:00 a 17:30 horas.

INFORMACIÓN PROGRAMA FAMILIAS INQUEDAS · Concello de Oleiros

O Concello de Oleiros organiza para o outono 2024 un ciclo de seminarios, enmarcados no Programa de Familias Inquedas, co fin de ofrecer ás familias de Oleiros novas ferramentas, habilidades e capacidades para, dende un enfoque preventivo e dirixido a toda a comunidade, mellorar a convivencia nas familias e proporcionarlles recursos nos que apoiarse no momento da crianza das súas fillas e fillos.

Os seminarios están orientados ao apoio emocional nas distintas etapas dos 0 aos 18 anos, aínda que tamén hai contidos orientados á mellora da comunicación, ao fomento da autoestima e ao desenvolvemento das súas capacidades.

O formato destes seminarios está dividido en varias sesións para que as persoas participantes, pouco a pouco, vaian interiorizando estes novos enfoques e habilidades na crianza: a empatía, a igualdade, a confianza... A dinámica é similar aos obradoiros levados a cabo en anos anteriores.

Para impartilos vaise contar con profesionais que garanten non só experiencia e coñecemento na materia, senón tamén gran capacidade de comunicación e conexión emocional coas familias para garantir o necesario e desexado impacto transformador nas vidas desas persoas.

Son un total de 4 seminarios totalmente gratuítos: 2 orientados de forma xeneral ao benestar emocional na infancia e na adolescencia, na liña dos que se viñan desenvolvendo en anos anteriores; e outros 2 con contidos mais específicos como apoiar o empoderamento na etapa escolar e o apoio ás familias cun diagnóstico TEA.

Os seminarios teñen formatos e intensidades distintas e desenvolveranse nas dependencias de Servizos Sociais en Villa Echeverry en Perillo.

As inscricións serán a través da web municipal no apartado PARTICIPA/ACTIVIDADES SOCIALES a partir do martes 17 de setembro ás 09:00 h e ata o domingo 22 ás 23:59 h. Cada persoa, de forma individual, ten que realizar unha inscrición en cada seminario no que desexe participar.

Enlace: 

https://www.oleiros.org/es/actividades-sociales/-/asset_publisher/Zy1pF827NYjN/content/id/1339615

Agardamos que sexa do voso interese.

Xunta Directiva ANPA Valle Inclán

LISTAXE DEFINITIVA DAS PRESTACIÓNS DE APOIO AO COMEDOR ESCOLAR PARA O CURSO 2024/2025

Estimadas familias,

Xa están publicadas as listaxes definitivas de prestación de apoio ao comedor escolar para o curso 2024/2025 da Concellería de Servizos Sociais do Concello de Oleiros.

Podedes consultalas premendo na seguinte ligazón: https://bit.ly/4dS2bPN

Dende a Concellería queren lembrarvos que, segundo recolle a convocatoria, aquelas familias que teñades concedida a axuda e ao mesmo tempo teñades débedas coa facenda local, se as mesmas non están ao corrente de pago antes do día 11 de setembro, entenderase desistida a dita axuda (é necesario que entregar a xustificación do pago nas oficinas de Servizos Socias e Igualdade, tanto en Villa Echeverry en Perillo, como en Oleiros, na Rúa Camilo Díaz Baliño S/N).

Un saúdo e os mellores desexos para este novo inicio de curso.

Xunta Directiva ANPA Valle Inclán

Segue aberto o prazo para inscribirse nas ACTIVIDADES EXTRAESCOLARES

Benqueridas familias,

Como sabedes, segue aberto o prazo para inscribirse nas actividades extraescolares da ANPA Valle Inclán.

A súa realización está suxeita a acadar o número mínimo de alumnado inscrito, polo que vos animamos a anotarvos canto antes a fin de poder organizar correctamente o inicio de curso.

Por outra banda, debido a un erro, o prezo da actividade de TEATRO MUSICAL non figuraba correctamente na web e en Instagram. O custo da mesma é de 25€/mes por hora e media de clase semanal (venres de 16:00 a 17:30 horas). Desculpade as molestias.

Lembrámosvos a proposta de actividades:

- Baloncesto con Esproade e Club Basket Montrove
- Hockey con Club de Hockey Oleiros
- Balonmán con Club Balonmano Atlántico
- Música e movemento con Modum Escuela de Música
- Teatro musical coa Escola Galega de Teatro Musical
- Robótica con Robotix
- Yoga con Isa Veiga
- Patinaxe e Xogos de mesa con Activa
- Arte con Nosarte
- Pequechef, Ludoteca e Ponte ao día con Jumpingkids
- Multideporte e Acrodance con Sadanza.

Lembrade que para inscribirse nas actividades é preciso ser familia socia da ANPA.

Para darse de alta ou para renovar a inscrición, debedes rexistrarvos na plataforma de Miampa (se non o fixestes o ano anterior), pagar a cota de 35€ por familia e enviar o xustificante da transferencia. Tedes máis información no apartado ANPA VALLE INCLÁN do menú de MiAmpa e na web da asociación na seguinte ligazón:
https://anpa-valle-inclan.mozello.com/faite-soci/

Un saúdo,

Xunta Directiva ANPA Valle Inclán

INSCRICIÓNS XADREZ ABERTAS

Estimadas familias:

Xa podedes facer a inscrición na actividade extraescolar de XADREZ. Impartirá a actividade Marco Antonio Morales Mármol, competidor na División de Honor da Liga Galega co Círculo Ferrolano de Ajedrez.

CONVOCATORIA EXTRAORDINARIA COMEDORES ESCOLARES 2024/2025

Estimadas familias,

Hoxe luns 5 de agosto, ábrese un prazo extraordinario para solicitar a axuda de apoio ao comedor escolar. É moi importante que saibades, que as familias que xa presentaron a súa solicitude, NON é necesario que a volvan a presentar, pois serán baremadas en función aos novo límites, este prazo é SÓ, para as familias que non a tivesen presentado no prazo ordinario.

Este prazo extraordinario é motivado por;

“ Unha vez rematado o prazo de recepción de solicitudes, e xa durante o período de admisión, a Comisión de Valoración procedeu a revisar un número considerable de solicitudes presentadas e valorou pertinente abrir un prazo extraordinario para a presentación de novas solicitudes.

Esta valoración ten a finalidade de beneficiar a un maior número de solicitantes, polo que se aproba unha nova táboa de acceso das porcentaxes referenciadas do IPREM, en función ao numero de membros da unidade familiar “

Tedes toda a información necesaria e os anexos, nas ligazóns que vos adxuntamos.

https://www.oleiros.org/inserci%C3%B3n-social/-/asset_publisher/b7mp7IIvqmfc/content/id/1267352

https://www.oleiros.org/inserci%C3%B3n-social/-/asset_publisher/b7mp7IIvqmfc/content/id/1269655  

Recibide un cordial saúdo

Xunta DIrectiva ANPA Valle Inclán