En resposta á información publicada en La Voz de Galicia o 12 de novembro de 2025
A ANPA do CEIP Valle Inclán quere manifestar a súa sorpresa —e
certa perplexidade— ao ler en La Voz de Galicia que "a
Xunta non vai reforzar o seu cadro docente, como reclaman os pais do
alumnado". Perplexidade, si, porque semella que a Consellería
de Ensino responde antes á prensa que ás familias e ao propio
centro.
Cómpre lembrar que que nin o CEIP nin a ANPA recibiron resposta oficial ningunha ao escrito rexistrado o 19 de setembro de 2025 perante a Xefatura Territorial da Consellería de Ensino. A día de hoxe seguimos á espera desa resposta, polo que a información publicada polo xornal podería non ser exacta. Segundo a nova, o Valle Inclán “gaña terreo alleo” e mesmo recibe un “reforzo de dous docentes máis”. Debe de ser que vivimos nunha realidade paralela, porque no colexio non atopamos o reforzo. O que si atopamos, contados un por un, son 1,5 docentes menos ca o curso pasado. Igual é que marcharon a ese terreo novo e non nos deron aviso.
Cómpre subliñar ademais, que o reforzo do cadro docente non é só unha demanda das familias: é tamén unha solicitude formal da Dirección do centro, do Consello Escolar e do propio Concello de Oleiros.
E, por suposto, non imos descartar que todo isto sexa apenas un problema de espazo… no xornal. A nova aparecía confinada nunha columniña mínima en La Voz, así que igual o xornalista tivo que recortar tanto, tanto, que só puido incluír un anaco do comunicado oficial que —imaxinamos— a Consellería de Ensino lle enviou antes ca nós.
Seguro que no texto completo, ese que está a piques de chegar ao CEIP e á ANPA, explícase que, aínda que o centro perda 1,5 docentes respecto ao curso pasado, desde a Xunta van garantir que non se xunten aulas enteiras nin se supriman días lectivos por un par de baixas imprevistas; que se manterán todos os proxectos didácticos anteriores—mesmo mellorados— e que, xa que logo, as nosas crianzas estarán igual ou mellor ca nós na escola nos anos 80 e 90, que polo menos tiñamos unha excursión ao ano para airear a cabeza.
Porque a realidade hoxe, curso 2025–26, é teimuda coma ela soa: menos horas de biblioteca ca nunca, sen tardes abertas para estudar coas crianzas, sen sección bilingüe, sen informática, sen robótica, sen excursións e cun horto escolar reducido á etapa de infantil.
Dito isto, seguimos á espera —con infinita paciencia galega— da resposta oficial que, confiamos, chegará máis completa ca columna do xornal.
Os pais e nais do colexio seguiremos facendo o que nos corresponde: defender unha educación pública de calidade, reclamar rigor nas informacións e pedir, con toda a retranca posible, que se deixe de gobernar a golpe de titular e se empece a facelo a golpe de responsabilidade.
Porque ao final, o importante non é o que se publica, senón o que realmente pasa nas aulas e quen paga as consecuencias.
ANPA CEIP Valle Inclán
Oleiros, 14
novembro de 2025
A nova: El Valle-Inclán de Perillo gana un terreno anexo al colegio, pero no más profesores