Faladoiro 12/3/2026: “Medrar con pantallas NON é igual a progreso”
Convidamos ás familias, docentes e todo o público interesado a participar no faladoiro “Medrar con pantallas NON é igual a progreso”, organizado polas ANPA/AFA de Oleiros e “Escola Saudable” (escuelasaludable.org).
📅
Data: Xoves 12 de marzo de 2026
🕚 Horario: 16:30 h
📍 Lugar: Centro Cultural A Fábrica (Perillo)
Con esta actividade e a través da campaña ''Escola Saudable" búscase reflexionar e sensibilizar sobre o uso dos medios dixitais nos eidos familiar, do ensino e social, así como das consecuencias do seu inicio precoz e desregulado.
Identificaranse os mitos do proceso hiperdixitalizador.
Informarase dos consensos e alertas científicas sobre a disrupción do uso precoz das pantallas na saúde física e mental, o neurodesenvolvemento e a aprendizaxe, ademais da súa pegada ambiental e as estratexias algorítmicas de enxeñería social.
Informarase do cambio de paradigma proposto, entre outras, pola Asociación Española de Pediatría (AEP) cando, ante a “nova evidencia científica” deste “problema de saúde pública", recomenda dende decembro de 2024 CERO pantallas até os 6 anos e menos de 1 entre 7-12 anos e menos de 2 horas a partir dos 13 anos, incluíndo o tempo escolar e de deberes, postergando a introdución do smartphone. Explicarase igualmente por que os e as pediatras exhortan dende abril de 2025 ás institucións educativas a instruír en competencias dixitais sen pantallas nas aulas.
Informarase de pautas concretas, encamiñadas a postergar/negociar o uso de pantallas en menores, e dos pactos de familia nesa liña.
Máis iformación AQUÍ
Contaremos con persoas coordinadoras da campaña: Xulio Carmona (enfermeiro de drogodependencias, especialista en saúde mental e experto en adiccións tecnolóxicas) e Menchu Outón (veterana docente de secundaria no ensino público).
Agradecemos enormemente ó Concello de Oleiros a súa colaboración para poder levar adiante esta iniciativa.
Consideramos que esta actividade pode ser importante para facer comunidade en torno a un tema tan relevante coma este.
Convidámosvos a participar!
Xunta Directiva ANPA Valle Inclán
ANPA/AFA participantes:
- ANPA Valle Inclán (CEIP Ramón María del Valle Inclán, Perillo)
- AFA Nós (CEIP Juan de Vega, Nós)
- AFA CEIP Luis Seoane (CEIP Luis Seoane, Mera)
- ANPA Ensino CEIP Rabadeira (CEIP Rabadeira, Oleiros)
- ANPA Bidueiro CEIP Isidro Parga Pondal (CEIP Isidro Parga Pondal, Sta. Cruz)
- ANPA Miguel Hernández (IES Miraflores, Oleiros)
Por un ensino público digno e de calidade
📢 Chegou o momento de volver sair as rúas, de defender a escola pública e o futuro que queremos.
Os centros públicos levan tempo afrontando dificultades que non poden seguir normalizándose: falta de persoal tanto docente coma non docente, desatención a diversidade, e falta de mantemento e grandes reformas das infraestructuras.
Non falamos de casos illados. Falamos dunha realidade que é patente en toda a provincia. Por iso imos participar nunha mobilización provincial na defensa dun ensino público digno, inclusivo e de calidad.
📅 Sábado 28 de febreiro
⏰ 11.00 h · Saída Praza Ourense ·
Remate no Parrote (con foliada)
Como noutras ocasións acudiremos vestidos de superhéroes.
O ensino público necesita que as familias loitemos por él.Non reclamamos privilexios: esiximos que se garantan dereitos fundamentais.
Animádevos a participar! Seguimos loitando!
Xunta Directiva ANPA Valle Inclán
NOTA DE PRENSACharla para familias TEA- Concello de Oleiros
Dende a concellería de Servizos Sociais e Igualdade do Concello de Oleiros infórmannos dunha charla aberta o vindeiro xoves 12 de febreiro ás 18:30 h no Auditorio das Torres de Santa Cruz.
O título da charla é “O impacto nas familias dun diagnóstico TEA. A importancia dos grupos de apoio na crianza” e será impartida por Rocío Salgado, psicóloga e terapeuta familiar especializada en acompañamentos a persoas no espectro autista e as súas familias.
O TEA (Trastorno do Espectro Autista) ten unha prevalencia de aproximadamente 1 de cada 100 nacementos en España. Nas últimas décadas produciuse un importante incremento, posiblemente debido a unha maior detección e uns diagnósticos mais precisos.
A realidade é que afecta a áreas fundamentais no desenvolvemento dunha persoa repercutindo de forma importante na súa vida diaria. As familias das nenas e nenos con este diagnóstico son indispensables na súa evolución, pero en moitas ocasións séntense soas e incomprendidas pola multitude de obstáculos e dificultades que atopan tanto no propio entorno familiar e veciñal, como no educativo, formativo, laboral e incluso sanitario.
É fundamental que poidan contar tanto de apoios externos como de espazos nos que expresarse libremente, onde se lles escoite sen sentirse xulgadas. Coidar o seu benestar emocional e psicolóxico é esencial para o desenvolvemento dos seus fillos e fillas.
Dende o Concello de Oleiros ofrécese esta charla aberta sobre estas cuestións na que ademais se informará da existencia destes grupos estables de apoio para familias nesta situación. Non é necesaria a inscrición previa para asistir á charla.
Agardamos que esta información sexa do voso interese.
Xunta Directiva ANPA Valle Inclán
Entradas "seguras" ao CEIP Valle Inclán: un circo acuático en días de choiva!
Querida comunidade, é moi difícil resolver os problemas na entrada cando chove? Iso din, pero ano tras ano repetimos o clásico: charcos que parecen lagos, nenos e nenas calados ata os ósos, e familias facendo malabarismos para non resbalarnos. Que boa maneira de comezar o día!
Imaxinádevos o festival: dous patios cubertos dentro do colexio, listos e secos, pero as familias con fillos pequenos temos que facer cola no exterior. E cando chove de verdade, o circo complétase: familias apiñadas agardando, coches improvisando parking salvaxe, autobuses bailando o tango co tráfico, todo aliñado con prisas, negrume, chuvia de balde e charcos dignos dun safari amazónico. Un cóctel perfecto para sustos, resbalóns e nervios a flor de pel, e esperemos que nada máis, pero papeletas vamos comprando...
E, sin embargo, a solución parece sacada dun manual de sinxeleza: por que non abrir as portas 5 ou 10 minutos antes nos días de choiva? Así, entrada máis escalonada, as familias madrugadoras ou peonís poderiamos agardar nos patios cubertos, como se facía ata o COVID (si, ese tempo en que a lóxica imperaba un pouco máis). Pero non, mantemos o protocolo rígido, e os nenos pagan a factura.
Vamos a supor que, por algunha razón máxica, a normativa tivera un chisco de sentido común e permitise que se puidese fixar horarios de apertura de portas máis flexibles, e priorizar a seguridade do alumnado por riba de todo.
Que bonito sería que, entre toda a comunidade educativa, conseguiramos que o responsable de levar adiante ese cambio estivese encantado de facelo, minimizando así o risco de que pase algo fóra do colexio... aínda que, técnicamente, "non sexa da súa responsabilidade" (ou si?).
Para rematar, un guiño, mirade a viñeta que adorna a portada do propio Plan de Convivencia do CEIP Ramón Mª del Valle Inclán. Forges ten razón, pero igual poderíamos empezar uníndonos baixo un tellado.
Xuntos podemos facer que a convivencia sexa real... e seca!
A seguridade dos nosos fillos non agarda.
Comparte, apoia e escribe a túa queixa aos que teñen a responsabilidade!A ANPA xa o fixo, podes consultar o escrito que enviamos AQUI
Festa de entroido 2026
Estimadas familias,
O vindeiro venres 13 de febreiro, entre as 16:00 e as 19:00 horas, celebraremos a Festa de Entroido á que toda a comunidade educativa está convidada.
Haberá animación, xogos para a cativada e un desfile de disfraces cun pequeno agasallo para todos os que se animen a participar.
Tamén contaremos co posto de merendiñas das familias de 6º de ed. primaria co que recadarán fondos para a súa viaxe de fin de curso.
Lembrade que esa tarde non haberá actividades extraescolares no colexio, polo que as crianzas deberán estar acompañadas dun adulto a partir das 16:00 da tarde, que as supervisará en todo momento e se fará responsable do que merenden durante a festa.
Lembrade tamén que o acceso ó invernadoiro está prohibido.
Animádevos a vir, pasarémolo moi ben!
Xunta Directiva ANPA Valle Inclán
Regulamento servizos: Comedor, mañanceiros, cambiadores
Estimadas familias:
Uso das pantallas PDI nas aulas: resultado da enquisa
A enquisa sobre o uso das pantallas dixitais interactivas (PDI) nas aulas de infantil e primaria, realizada a petición das familias co fin de abrir o debate na comunidade educativa sobre o seu uso con fins pedagóxicos, foi presentada no consello escolar.
Trala xuntanza, a única vía aberta para avanzar neste debate é falar cos titores e titoras dos vosos fillos e fillas.
Podedes consultar os resultados premendo na seguinte ligazón: ENQUISA.
Xunta Directiva ANPA Valle Inclán
CANCELADA A CHARLA DE HOXE EN RIALEDA
❌❌🧪🌱 A charla de divulgación científica prevista para hoxe venres na Biblioteca Rialeda tivo que ser cancelada por causas de forza maior. Esperamos poder anunciar pronto a nova data de celebración.
🧪👩🔬 CHARLAS DE DIVULGACIÓN CIENTÍFICA. Volve a Rialeda o programa "Ler para saber"
📅 O venres 23 de xaneiro ás 18:30h terá lugar a primeira das charlas científicas incluídas no programa Ler para Saber, organizado pola Rede de Bibliotecas Públicas do Concello de Oleiros en colaboración coa UDC. “Movemento e defensa das plantas” da man de José Díaz Varela, catedrático de Fisioloxía Vexetal da Universidade da Coruña, será a que inaugure este programa.
Os obxectivos do programa “Ler para saber” son achegar a ciencia a todas as persoas, ampliar os coñecementos científicos da cidadanía, fomentar a lectura e consultas sobre temas relacionados coa ciencia e o coñecemento específico dunha materia determinada ademais de dinamizar os fondos bibliográficos sobre estes temas nas bibliotecas municipais.
O programa “Ler para saber: charlas de divulgación científica” completarase con outras cinco charlas máis os días 27 de febreiro (“Solucións baseadas na natureza. exemplo: recuperación do Mar Menor” con con Alatzane Carbosena), o 13 de marzo (“O museo e os seus obradoiros” con Fernando Luis Fontes Blanco), o 10 de abril (“Citeeconto que facemos!” con Fernando Martínez Abella), o 8 de maio (“Explorando o universo microscópico” con Elena Fernández González) e o 5 de xuño (“Microbioma e saúde” con Margarita Poza Domínguez).
As charlas de divulgación científica están dirixidas a nenas e nenos, a partir de 10 anos, adolescentes e para público en xeral.
O alumnado de 3º ciclo de primaria do CEIP Ramón María del Valle Inclán participa tamén nesta actividade.
A entrada é de balde para toda aquela persoa que desexe asistir.
Máis información na Biblioteca Rialeda.
Podedes descargar o cartaz premendo AQUÍ.
Agardamos que sexa do voso interese.
Xunta Directiva ANPA Valle Inclán
O noso bosque
Hoxe iniciouse a plantación do noso novo bosque autóctono, na parcela que xa forma parte do colexio grazas á súa cesión por parte do Concello de Oleiros.
Como sabedes, o noso colexio foi seleccionado este curso para participar no programa “Aprender do bosque” do Centro de Arte Fundación María José Jove e coa participación do CFEA (Centro de Formación e Experimentación Agroforestal de Guísamo)
Grazas á colaboración entre centro, ANPA e Concello conseguimos ser seleccionados para levar adiante este proxecto colaborativo que une arte, ciencia e mediación cultural, co obxectivo de recuperar hábitats naturais e favorecer a biodiversidade.
O programa “Aprender do bosque”, dentro do Proxecto Reverdecer, propón establecer una relación continua e práctica cun ecosistema vivo que evoluciona xunto coa comunidade escolar.
Contar cun bosque no centro educativo facilita o desenvolvemento de competencias ecolóxicas desde idades temperás, promove a responsabilidade compartida no coidado e xera un espazo para reflexionar sobre o presente e o futuro dos ecosistemas locais.
Desde una mirada artística e pedagóxica, o proxecto ofrece ferramentas para espertar a sensibilidade, a curiosidade e a creatividade arredor do mundo vexetal.
Hoxe as primeiras árbores xa empezan a medrar no noso bosque: bidueiras, sobreiras, castiñeiros e carballos. Temos que mimalas!
Oito aulas participaron, da man dos seus mestres e mestras e xunto a técnicos do Concello, do CFEA e da Fundación María José Jove, na plantación do novo bosque do colexio.
A ANPA Valle Inclán, como parte da comunidade educativa, tamén estivo convidada a participar nesta xornada tan importante. Estamos moi agradecidas de poder colaborar en proxectos que conseguen mellorar a calidade do ensino dos nosos fillos e fillas.
Xunta Directiva ANPA Valle Inclán
Enquisa: uso de pantallas en horario lectivo curso 2025 2026
Estimadas familias,
na pasada asemblea xeral ordinaria do luns 15/12/25, varias familias amosaron a súa preocupación polo uso e o tempo adicado ás pantallas nas aulas, polo que decidiuse elaborar unha enquisa para recoller datos sobre o uso da pantalla en horario lectivo.
É unha enquisa anónima e os resultados expoñeranse ante o Consello Escolar á volta das vacacións de Nadal.
Podedes realizala premendo na seguinte ligazón:
https://forms.gle/3k33wp782YigEyTx5
Moitas grazas de antemán pola vosa colaboración.
Xunta Directiva ANPA Valle Inclán
ANDAINA SOLIDARIA POLA NENA DE OLEIROS
Agardamos que se anime a colaborar moita xente e que se recauden moitos fondos.
Xunta Directiva Anpa Valle Inclán.
Concesión da subvención do Concello Oleiros 2025
Conforme á Resolución da Sétima Tenenta de Alcalde, delegada de Cultura e Normalización Lingüística, Ensino e Xuventude, nº 2025006129, de 20/11/2025, mediante o que se resolveu a concesión de subvencións ás ANPAs dos centros de ensino público para a realización de actividades no ano 2025, a ANPA Valle Inclán recibirá un total de 10.349,76 euros para sufragar parcialmente os seguintes gastos do exercicio correspondentes á realización das seguintes actividades:
· Festas escolares
· Obradoiros formativos para o alumnado
· Escola de familias
· Campamento de ciencia
· Mural colaborativo
Xunta Directiva ANPA Valle Inclán
Festa de Nadal 2025
Estimadas familias,
O último día lectivo de decembro, o venres 19/12/25, entre as 16:00 e as 19:00 horas, celebraremos a Festa de Nadal, á que toda a comunidade educativa está convidada.
Desta volta, o evento disporá dun inchable para os máis pequenos (infantil e primeiro ciclo de primaria), disco de nadal con karaoke e un obradoiro para realizar e decorar as cartas para os Reis Magos.
Ademáis, coma sempre contaremos co posto de merendiñas das familias de 6º de educación primaria, que aproveitarán a oportunidade para recadar fondos para a súa viaxe de fin de curso.
Lembrade que a partires das 16:00 h. non haberá monitorado para facerse cargo do alumnado, polo que as crianzas deberán vir acompañadas dun adulto que deberá supervisalas en todo momento e farase responsable do que merenden durante a festa. Queda prohibido o acceso ó invernadoiro, debido aos estragos causados en anteriores festas. Pregamos a vosa colaboración.
Contamos con todos vós, animádevos a asistir!!
Xunta Directiva ANPA Valle Inclán
