6M - Mobilizacións de toda a comunidade educativa galega
Estimadas familias,
O vindeiro mércores 6 de maio a comunidade educativa galega volverá saír á rúa en defensa do ensino público. Farao nunha xornada de mobilizacións convocada en máis de vinte localidades, impulsada por unha rede ampla e plural de ANPAs, colectivos da comunidade educativa, profesorado e estudantado, para reclamar máis medios, máis profesorado e mellores condicións nos centros.
Como non podía ser doutra maneira, desde a ANPA do CEIP Valle Inclán imos participar nesta mobilización e queremos animarvos a acompañarnos nesta convocatoria.É importante porque o que está en xogo non é só a situación dun centro ou dun curso concreto, senón a calidade da escola pública que queremos para as nosas crianzas: unha escola con recursos suficientes, atención digna para todo o alumnado e condicións que permitan ensinar e aprender con normalidade.
No noso cole sabemos ben do que falamos. Ao longo deste curso vivimos en primeira persoa as consecuencias dos recortes e da falta de profesorado, e iso afectou ao día a día do centro e xerou preocupación.
Ademais, sabemos que o profesorado e o equipo directivo tamén están a soportar unha grande carga de traballo e que sofren en primeira persoa as consecuencias dos recortes, da falta de recursos, da necesidade constante de adaptación e mesmo da incorporación de novas esixencias tecnolóxicas sen que sempre vaian acompañadas da formación, do tempo e dos medios necesarios. E, malia todo iso, seguen sostendo o día a día do centro o mellor que poden, tamén nas tormentas.
Por iso cremos que esta mobilización merece o apoio das familias: porque defender o ensino público é tamén defender o benestar do alumnado e das persoas que o sosteñen cada día.
Vémonos o mércores ás 18:00 no parque de Catro Camiños, detrás do Remanso
https://asembleasensino.gal/mobilizacions/
6M - Mobilizacións de toda a comunidade educativa galega
