Grazas a todas e todos pola xornada de onte no Pleno do Concello de Oleiros

Onte, no Pleno Municipal do Concello de Oleiros, a primeira intervención foi de todas as ANPA/AFA dos Centros de Educación Infantil e Primaria de Oleiros.

Lemos o noso manifesto para reclamar unanimemente á administración autonómica os recursos precisos para que os nosos coles funcionen con normalidade e cumpran cos estándares mínimos de calidade e de inclusión que a Lei contempla. Un manifesto que representa o sentir común das familias de Oleiros. Vestimos de negro para amosar o desamparo que sufre o ensino público.

👨‍👩‍👧 Grazas ás familias que fixeron o esforzo de asistir ás 20:00 h para acompañarnos.

🏫 Grazas ós Directores e Directoras dos CEIP que asistiron, así coma ós docentes dos colexios. Non puideron acudir todos, pero unha parte estivo alí, e a súa presenza significa moito para nós.

🤝 Grazas a aqueles partidos políticos que entenderon as nosas reclamacións e amosaron o seu compromiso coa educación pública.

💚 Grazas ó Concello de Oleiros, coma sempre, polo seu apoio firme polo ensino público de calidade. Grazas por brindarnos este espazo para reivindicar de viva voz e poder esixir que non se sigan vulnerando os dereitos dos nosos fillos e fillas.

Para todos os representantes das ANPA/AFA que asistimos onte foi moi importante comprobar esta unión entre todos nós nesta loita ante os responsables autonómicos que deben garantir unha escola pública digna, inclusiva e de calidade para todas as crianzas.

Seguiremos traballando ata conseguilo como comunidade educativa unida.

Xunta Directiva ANPA Valle Inclán