Escola de familias: A crianza consciente como aliada dun acompañamento escolar saudable - xoves 10/4/2025
Boas!!
como sabedes, a Escola de Familias dará comezo a semana que ven no noso colexio. A actividade está dirixida a toda a comunidade educativa (pais, nais e docentes) e será facilitada por Clara Rodríguez, orientadora educativa con ampla experiencia en educación formal e formación de futuros docentes.
O vindeiro xoves terá lugar a primeira charla, “A crianza consciente como aliada dun acompañamento escolar saudable”. Nela exploraremos os diferentes estilos de crianza desde unha perspectiva libre de xuízos, permitindo que cada familia identifique o seu propio modelo e o seu impacto no desenvolvemento escolar e emocional da cativada. Aprenderemos ferramentas e prácticas concretas para aqueles que desexen aplicar unha crianza consciente, promovendo un ambiente de aprendizaxe seguro e motivador.
Están programados cinco obradoiros:
- Xoves 10/4/2025: “A crianza consciente como aliada dun acompañamento escolar saudable” (dirixido a Ed. Primaria)
- Xoves 24/4/2025: “Neuroeducación para pais e nais” (dirixido a Ed. Primaria)
- Xoves 8/5/2025: “Fomentando a autonomía nas tarefas escolares” (dirixido a Ed. Primaria)
- Xoves 15/5/2025: “Xestión do tempo en educación primaria” (dirixido a Ed. Primaria)
- Xoves 22/5/2025: “Acompañamento emocional na primeira infancia” (dirixido a Ed. Infantil)
Será unha moi boa ocasión para aprender a axudar á nosa cativada.
ANIMÁDEVOS!
Xunta Directiva ANPA Valle Inclán
IMPORTANTE:
A inscrición realizarase no seguinte formulario: Inscrición Escola de Familias
A ANPA pon a disposición dos asistentes un servizo de canguraxe para poder atender á cativada durante a celebración da Escola de Familias. Para facer uso del é imprescindible inscribir ós menores previamente a través do formulario.
Os asistentes non socios da ANPA deberán abonar unha cota de 4€ por obradoiro. A cota deberá abonarse en efectivo no local da ANPA (horario de luns a venres de 16:00-18:00h ) antes do 8 de abril de 2025.