ANPA Valle Inclán - Asembleas

Convocatoria asemblea ordinaria 15/12/2025

Sun, 07 Dec 2025 10:56:00 +0000

Estimadas familias,

o vindeiro luns 15 de decembro ás 16:30h. en primeira convocatoria, celebrarase unha asemblea ordinaria de familias socias no comedor escolar.

ORDE DO DÍA:

Lectura e aprobación, se procede, da acta da Asemblea Extraordinaria celebrada o 24 de setembro de 2025.
Presentación, e se procede, aprobación de contas.
Aprobación do regulamento do comedor.
Presentación da PXA.
Aprobación do uso da subvención do comedor para melloras: adecuación do mobiliario e insonorización.
Obradoiros subvencionados pola ANPA para o alumnado. Peticións do equipo docente.
Problemática actual no Colexio: situación do equipo docente, falta de persoal docente. Medidas adoptadas polo claustro de apoio ás reivindicacións. Proxectos suspendidos e proxectos que continúan.
Medidas e reivindicacións levadas a cabo ata o de agora en relación ó punto 7, e próximas accións a desenvolver.
Rogos e preguntas.

Esta asemblea non é só para presentar as contas e a programación anual e outros traballos, senón tamén para compartir e debater sobre a grave problemática que está a sufrir a ensinanza pública. A gran maioría de colexios públicos galegos están a levar a cabo mobilizacións de protesta pola carencia de mestres e especialistas, faltas de mantemento e outros recursos insuficientes. Isto non afecta só aos centros de Oleiros, A Coruña, Cambre e Culleredo, senón a todas as provincias galegas. Este mes de decembro celebrouse unha reunión con unha trintena de ANPAs da Coruña e arredores, onde se puxo de manifesto o preocupante das carencias que están a padecer, e a pesar dos nosos problemas, somos un colexio privilexiado en comparación. Pero como di o noso refrán: "Cando a barba do teu veciño vexas pelar, pon a túa a remollar".

Non esperemos a que os problemas cheguen á nosa porta; agora é o momento de actuar xuntos en defensa da educación pública de calidade que merece os nosos fillos e fillas.

Necesitamos que a máxima número de familias socias estea presente para debater conxuntamente as carencias que está a sufrir o noso colexio e as que afectan a toda a rede de educación pública. Só a través dunha voz colectiva forte poderemos visibilizar estas problemáticas ante as administracións e conseguir que tomen as medidas necesarias.

No seguinte enlace poderá atopar a documentación ao respecto.

Un saúdo,

Xunta Directiva ANPA Valle Inclán

Convocatoria asemblea extraordinaria 17/07/2023

Mon, 10 Jul 2023 21:46:00 +0000

Estimadas familias,

o vindeiro luns 17 de xullo ás 19:00h. en primeira convocatoria e 19:30h. en segunda convocatoria celebrarase unha asemblea extraordinaria de familias socias.

Adxuntamos convocatoria.

Un saúdo,

Xunta Directiva ANPA Valle Inclán

230717_convocatoria_extraordinaria.pdf

Convocatoria asemblea extraordinaria 21/06/2023

Wed, 14 Jun 2023 10:05:00 +0000

230621_convocatoria_extraordinaria.pdf

Convocatoria asemblea extraordinaria urxente 03/05/2023

Wed, 26 Apr 2023 10:04:00 +0000

230503_convocatoria_extraordinaria_urxente.pdf

Convocatoria asemblea ordinaria 22/11/2022

Tue, 15 Nov 2022 10:50:00 +0000

221130_convocatoria_ordinaria.pdf

Convocatoria asemblea extraordinaria 22/06/2022

Wed, 15 Jun 2022 09:59:00 +0000

220622_convocatoria_extraordinaria.pdf

Acordos da asemblea ordinaria do 22 de novembro de 2021

Fri, 08 Apr 2022 20:18:00 +0000

Resumo dos acordos acadados na asemblea ordinaria da ANPA Valle Inclán do 22 de novembro de 2021 (acta aprobada na asemblea extraordinaria do 8 de abril de 2022)

Emprazamento: Sala de usos múltiples do Edificio Infantil - Primeiro Ciclo de Primaria do CEIP Ramón María del Valle Inclán
Asistentes: 49 nais e pais.
Hora de inicio: 18:25 h.
Hora de finalización: 20:08 h.

Antes do inicio da sesión, o novo equipo directivo do CEIP Ramón María del Valle Inclán, formado por Carmen Campo Fernández (directora), María Bandín Lamas (xefa de estudios) e María Fernández Porto (secretaria), preséntase na asemblea de socios, para mostrar a súa intención de colaborar coa ANPA sempre que sexa preciso. Fan unha chamada de atención con respecto á aparición de pancartas colgadas días atrás no centro escolar, xusto tralo anuncio da convocatoria desta asemblea. Pediron ós presentes que os asuntos a debater na asociación hanse de tratar a través das canles axeitadas, remarcando que non deben transcender provocando molestias ó resto da comunidade educativa.

ACORDOS

Aprobación da acta da asemblea do 1 de setembro 2021 (punto 1 da orde do día).

As contas do exercicio 2021, ata outubro, quedan aprobadas (punto 2 da orde do día).

Presidencia e secretaría quedan vacantes na Xunta directiva da ANPA. Anúnciase a apertura de candidaturas para ocupar os cargos dispoñibles. Non aparecen persoas voluntarias, polo que quedan abertas as candidaturas á espera de novas incorporacións (punto 3 da orde do día).
Proponse un novo servizo de xestión integral de comedor a través da empresa especializada Jardanay. Búscase profesionalizar os servizos, eliminando intermediarios e que a comunicación sexa directa entre as familias e a empresa, para unha mellor atención do alumnado. Deste xeito, conseguiríase ademais unha baixada substancial na cota de comedor para as familias, sen diminuír en ningún caso a calidade, tan só o modelo de xestión.
Tras someterse a votación, gaña por maioría non contratar a xestión integral, sendo o resultado 23 a favor, 24 en contra e 4 abstencións (punto 5 da orde do día).
A causa do vencemento do contrato con ADC As Mariñas, amósanse tres presupostos de empresas susceptibles de asumir o servizo de extraescolares. Ademais de novos prezos, plantéxase unha renovación das actividades.
Tras someterse a votación, decídese seguir coa xestión actual, sendo o resultado 19 votos para ACD As Mariñas, 13 votos para Serocio e 0 votos para Move. Houbo 9 abstencións (punto 6 da orde do día).

Dada a delicada situación do CEIP con respecto ós recortes de profesorado de PT e AL, neste curso a ANPA mobilizouse a través de distintas vías para chamar a atención da opinión pública e concienciar (mediante concentracións, notas de prensa, etc.) e tamén a través da vía administrativa, enviando oficios por rexistro oficial dirixidos á Inspección Educativa e á Xefatura Territorial da Consellería Cultura, Educación e Universidade, así como iniciando un expediente de queixa ante a Valedora do Pobo de Galicia (alto comisionado do Parlamento de Galicia para a defensa dos dereitos e liberdades que supervisa de oficio ou mediante denuncia a actividade da Administración da Comunidade Autónoma galega).
Decídese continuar coas reivindicacións, iniciando unha campaña antes do Nadal, animando ás familias a que escriban cartas dirixidas ós Reis Magos nas que se pida como desexo para o novo ano a dotación destes profesionais, para despois remitir todas esas postais á Xunta de Galicia (punto 7 da orde do día).
Proponse ademais recoller firmas para enviar un novo escrito á Consellería.

Recórdase ás familias socias que se queren revisar as actas completas aprobadas están a súa disposición na oficina da ANPA, previa cita.

En Perillo a 8 de abril de 2022

Xunta Directiva ANPA Valle Inclán

Convocatoria asemblea extraordinaria 08/04/2022

Fri, 01 Apr 2022 20:08:00 +0000

220408_CONVOCATORIA_ASEMBLEA_EXTRAORDINARIA.pdf

Convocatoria asemblea ordinaria 22 de novembro de 2021

Mon, 15 Nov 2021 22:24:00 +0000

CONVOCATORIA DE ASEMBLEA ORDINARIA ANPA VALLE INCLÁN

EMPRAZAMENTO: Sala de usos múltiples do Edificio Infantil - Primeiro Ciclo de Primaria do CEIP Ramón María del Valle Inclán

DÍA: 22/11/2021

HORA: 17:45 horas en 1ª convocatoria e 18:15 horas en 2ª convocatoria

HORA LÍMITE DE FINALIZACIÓN: 20:00 horas

ORDE DO DÍA:

1- Lectura da acta da asemblea do 1 de setembro de 2021. Aprobación se procede.

2- Estado de contas. Aprobación se procede.

3- Presentación de candidaturas para a renovación de cargos da Xunta directiva da ANPA, para cubrir vacantes dispoñibles. En caso de única candidatura, aprobación se procede.

4- Normativa do servizo de comedor.

5- Presentación do servizo de comedor con xestión integral, por vencemento do contrato con ADC As Mariñas. Aprobación se procede.

6- Presentación de empresas de actividades extraescolares, por vencemento do contrato con ADC As Mariñas. Presentación de novos servizos. Aprobación se procede.

7- Situación dos recortes dos/as docentes de apoio por parte da Xunta de Galicia. Captación de novas ideas para continuar coas reivindicacións.

8- Rogos e preguntas.

Agradeceremos a vosa presenza.

Queremos lembrarvos tamén a obriga de cumprir con tódalas medidas establecidas pola normativa sanitaria vixente para a prevención do COVID.

Moitas grazas de antemán por vir e participar activamente nesta asemblea.

Saúde e saúdos!

En Perillo a 15 de novembro de 2021

Xunta Directiva do ANPA do CEIP Valle Inclán

Acordos asemblea extraordinaria 16 de xullo 2021

Wed, 01 Sep 2021 16:35:00 +0000

Acordos acadados na asemblea extraordinaria da ANPA Valle Inclán do 16 de xullo de 2021
(acta aprobada o 1 de setembro de 2021)

Emprazamento: Sala de usos múltiples do Edificio Infantil - Primeiro ciclo Primaria do CEIP Ramón María del Valle Inclán
Número de pais e nais presentes: 19
Socios representados/voto delegado: 3
Hora real de inicio: 18:15 horas
Hora de finalización: 20:08 horas

ACORDOS

Aprobación da acta anterior do 25 de xuño de 2021 por unanimidade (punto 1 da orde do día).
Cambio de catering. Apróbase Jardanay como nova empresa por unanimidade dos presentes (punto 2 da orde do día).
Apróbase favorecer a retirada do centro das instalacións modulares, dadas as condicións de insalubridade e a presenza de ratos no patio do colexio. De entre todas as propostas expostas e debatidas, apróbase por maioría a única solución viable para levar a cabo isto dentro do prazo dispoñible: a doazón da cociña ó Concello de Oleiros para o seu traslado a Guatemala, con dous votos en contra e catro abstencións (punto 3 da orde do día).

Recórdase ás familias socias que se queren revisar as actas completas aprobadas están a súa disposición na oficina da ANPA, previa cita.